په ټليپون د ښاغلي ټرمپ او ښاغلي پوتين اوږدو خبرو څخه وروسته د دوى د سياليو تود ډګر يوکراين کې لوبه کېداى شي پاى ومومي. له يوکراين وروسته ترهغو چې بله توده جګړه رامنځته کېږي، د نړۍ د نانديزو لوبو او يو بل ته خپل نرم او استخباراتي ځواک ښودلو ډګر کېدو لپاره افغانستان د زبرځواکو مشرانو د ژبو په سر دى. د ستخدريځه تګلارو له امله څلور کلونو واکمنۍ سره د کابل اوسنۍ سياسي واکمنۍ ونه توانېده چې په نړيوال دريځ د هېواد استازولي ترلاسه کړي. د افغانانو ترمنځ اختلافونو، د نړيوالو لخوا د امارت نارسميتوب او ملګروملتونو کې د هېواد د استازي نشتون پرديو ته لاره هواره کړې چې زموږ په اړه پرېکړې وکړي، همدا اونۍ د ملګروملتو امنيت شورا کې د افغانستان په اړه پريکړليکونو مسودې د جوړولو پرسر د چين او امريکا ناندرۍ روانې دي.
د يوکراين جګړه له افغانستان څخه د لويديځ د وتلو يو له لاملونو څخه وه. له دغې جګړې وروسته په نړيواله کچه جغسياست يا جيوپولټيک غوښتنې بدلېدونکي دي چې ستر اغيز به پر ايران، سعودي او ترکيه کوي. تر ايران وروسته، ترکيه د اسرايلو او روسيې له ګواښونو سره مخ کېداى شي. دغو ګواښونو د ترکيې ولسمشر اړ کړى چې له مهمو اسلامي هېوادونو څخه د ليدنې په ترځکې د پاکستان له لارې د چين د ملاتړ ترلاسه کولو هڅې لپاره اسلام اباد ته مخه کړي. د ترکيې دغه غوښتنه لامل شوې چې د ترکيې ولسمشر د افغانستان په اړه د پاکستان د درسځ سره همغږي وښيي. د امارت په اړه به د روسيې او ورسره د مرکزي اسيا هېوادونو دريځهم بدلون مومي ځکه يوکراين کې لويديځسره دښمني پاى موندلو سره نور د دښمن، دښمن، دوست نشي پاته کېداى.
ځيرک ميلتونه چې زور يې نړيوالو زبرځواکو سره برابر نه وي، د دوى د سياليو له ډګر کېدو څخه د خپل ملت د ملاتړ پر بنسټځان ساتي. افغانستان کې د #امارتوالو د شريعت او أميرالمومنين غوښتنه که څه هم امارتوال يې د افغانستان کورنۍ هيلې ګڼي خو دغه دواړه غوښتنې شاوخوا ۲ميليارده مسلمانانو پورې نيغ تړاو او په نړيوالو خپل اغيز لري، ځکه يې افغانستان د نړۍ د زبرځواکو مشرانو د ژبې د سر تکى ګرځولى. هېواد کې د تېرو اونيو خونړيو بريدونو او هک شويو رازونه خپرول څرګندوي چې د يوکراين د جګړې له پاى سره هېواد له نويو ننګونو سره مخ کېداى شي. هېڅ شک نشته چې د ناټو له وتلو وروسته يوه زرينه واره موږ يوځل بيا د وړو غوښتنو او يو څو کسانو د ځېل قرباني کړه.
خو اوس هم لا وخت شته که موږ افغانان په شريکه د نړيوالو اندېښنو پرځاى د خپلو خلکو او هېواد ګټو ته لومړيتوب او د خپل ولس غوښتنو ته په درناوي، نړۍ سره د سيال کېدو پرمخ خوځښت وکړو کېداى شي په شريکو هڅو هېواد له راتلونکو ستونزو وژغورو، خو که افغانان پخپل منځ کې سره جوړ نشي د ګاونډيو او نړيوالو لخوا به لا سختو وختونو سره مخ شي.
نور رحمان لېوال
#نرلېوال
